დეტალები

By Super User

მშობელი კატეგორია: ახალი ამბები

ივლ.15

გადასვლები: 227

„მედიკამენტების ფასები მაღალია მეზობელ ქვეყნებთან შედარებით და აფთიაქების მოგების მარჟა (ხშირად 100% -ზე მეტი) მნიშვნელოვნად აღემატება ევროკავშირის ქვეყნებში დადგენილ ზღვარს“, - ამის შესახებ ნათქვამია საქართველოში ჯანდაცვის მსოფლიო ორგანიზაციის (WHO) ოფისის მიერ ჯანდაცვის სისტემასთან დაკავშირებით მომზადებულ კვლევაში.

დოკუმენტში მიმოხილულია საქართველოს ჯანდაცვის პოლიტიკა, საყოველთაო ჯანდაცვის პროგრამა და არსებული ხარვეზები.

დოკუმენტის მიხედვით, საქართველოში მედიკამენტებზე ჯიბიდან გადახდები, 2018 წელს უმდიდრესი კვინტილის გარდა, ყველა წლისთვის და ყველა ჯგუფისთვის კატასტროფული ხარჯვის მთავარი განმაპირობებელი ფაქტორი იყო, რაც WHO -ს შეფასებით, ყველაზე დიდ გავლენას ახდენს ღარიბ შინამეურნეობებზე.

„ამბულატორიული მედიკამენტები თითქმის მთლიანად ჯიბიდან იფარება. 2017 წელს სახელმწიფომ მედიკამენტებზე და სამედიცინო საქონელზე მიმდინარე ხარჯების მხოლოდ 1.2% დააფინანსა, ხოლო ჯანმრთელობის კერძო დაზღვევამ გადაიხადა დამატებით 2.4%. შედეგად, მედიკამენტებზე მოდის ჯანდაცვის ხარჯების 36% და ჯიბიდან გაწეული ხარჯების 62%, რაც მაღალი მაჩვენებელია ევროპული სტანდარტებით. ამბულატორიული მედიკამენტებით გამოწვეული ფინანსური სიდუხჭირე უკავშირდება იმ ფაქტს, რომ საკვლევი პერიოდის განმავლობაში, 2013-2019 წლებში საყოველთაო ჯანდაცვის პროგრამა აფინანსებდა არაუმეტეს 100 მედიკამენტის ღირებულების 50%-ს და წელიწადში მხოლოდ 50-200 ლარის ფარგლებში. გარდა ამისა, შესყიდვების სააგენტოს მონაცემები მიუთითებს, რომ ძალიან მცირე რაოდენობის ადამიანმა ისარგებლა ამბულატორიული მედიკამენტების საყოველთაო ჯანდაცვის პროგრამის ფარგლებში დაფინანსებით: 2017 წელს საყოველთაო ჯანდაცვის პროგრამამ მხოლოდ 23 492 ლარი დახარჯა მედიკამენტებზე (სოციალური მომსახურების სააგენტო, გამოუქვეყნებელი მონაცემები, 2018 წლის 19 ნოემბერი). მედიკამენტებზე სახელმწიფო ხარჯების ეს ძალიან მცირე მოცულობა ასახავს ბიუროკრატიულ პროცედურას, რომელთანაც დაკავშირებულია დაფინანსებული მედიკამენტების მოპოვებას, სამიზნე ჯგუფის დაბალ ინფორმირებულობას, მედიკამენტების შეზღუდულ და მოძველებულ არჩევანს და მაღალ თანაგადახდას“, - აღნიშნულია მიმოხილვაში.

დოკუმენტში ასევე აღნიშნულია, რომ 2019 წელს საყოველთაო ჯანდაცვის პროგრამის ფარგლებში სახელმწიფო ხარჯებმა მედიკამენტებზე დაახლოებით 6 მილიონი ლარი შეადგინა შესყიდვების პროცესში ჩავარდნების, ყველაზე საჭირო მედიკამენტების მარაგის ამოწურვის, ადმინისტრაციული ბარიერებისა და სამიზნე მოსახლეობაში დაბალი ინფორმირებულობის გამო.

ამასთან, WHO-ს ქართული ოფისის მიმოხილვის მიხედვით, მედიკამენტებზე ჯიბიდან მაღალი ხარჯვა ასევე უკავშირდება ფასების რეგულირების ნაკლებობას, ექიმების მიერ ბრენდული წამლების ხშირ რეკომენდირებას და საცალო აფთიაქებში დაბალი ღირებულების გენერიკების შეზღუდულ ხელმისაწვდომობას (მსოფლიო ბანკი, 2017).

დეტალები

By Super User

მშობელი კატეგორია: ახალი ამბები

ივლ.07

გადასვლები: 250

"ანაზღაურების შედეგზე ორიენტირება და მოტივაციის მექანიზმებზე გადასვლა ეს ჩვენი ერთ-ერთი პრიორიტეტია", - ეს განცხადება ჯანდაცვის მინისტრმა ეკატერინე ტიკარაძემ ჯანდაცვის სამინისტროს 10-წლიანი გეგმის წარდგენისას გააკეთა. მინისტრმა ექიმების ანაზღაურებას შორის არსებულ დისბალანსზე ისაუბრა და აღნიშნა, რომ სახელმწიფო სხვადასხვა სფეროში სახელფასო ანაზღაურების მინიმალური ზღვარის განსაზღვრას შეეცდება, რათა ახალ თაობებს სხვადასხვა პროფესიაში შესვლის მოტივაცია გაუჩნდეთ.

„ჩვენ არ ვერევით იმაში თუ რა მაქსიმალური ანაზღაურება შეიძლება ჰქონდეს ექიმს, რადგან ექიმს ნამდვილად მაღალი ანაზღაურება უნდა ჰქონდეს, თუმცა რამდენად დაბალი ანაზღაურება არ შეიძლება ჰქონდეს ექიმს, ეს სამსჯელო თემაა, ვინაიდან ამას დარგის განადგურებისკენ მივყავართ. არის პროფესიები, სადაც მხოლოდ ერთი ექიმი გვყავს და ეს ექიმები ისეთ ასაკში არიან, რომ მათი მხრიდან ცოდნის მიღებაც შეუძლებელი ხდება. მნიშვნელოვანია, ახალგაზრდების წახალისება, რათა მათ იცოდნენ, რომ გარკვეული პროფესიის არჩევისას მათი სახელფასო ანაზღაურება დაცული იქნება“, - განაცხადა მინისტრმა.

ჯანდაცვის უწყების მიერ წარდგენილ პრეზენტაციაში პროფესიების მიხედვით ყოველთვიური სახელფასო ანაზღაურების მინიმალური და მაქსიმალური ანაზღაურებაა გაწერილი, რითიც მინისტრის მიერ სამედიცინო პროფესიებში არსებული დისბალანსია ნაჩვენები.

ინფოგრაფიკის მიხედვით, საქართველოში ყველაზე მაღალი ანაზღაურება პლასტიკურ და რეკონსტრუქციულ ქირურგიაში დასაქმებულ ექიმებს აქვთ. სამედიცინო პერსონალის ანაზღაურების ნაწილში ქვეყანაში არსებული უთანაბრობა და დისბალანსი კი ასე გამოიყურება:

www.bm.ge

დეტალები

By Super User

მშობელი კატეგორია: ახალი ამბები

ივლ.15

გადასვლები: 149

ფინანსური დაცვის გასაძლიერებლად ამბულატორიული მედიკამენტები უფრო ხელმისაწვდომი უნდა გახდეს ადამიანებისთვის, - ამის შესახებ ნათქვამია ჯანმოს ბარსელონას ოფისის, (ჯანმო-ს ევროპის რეგიონალური ოფისის ქვეყნის ჯანდაცვის პოლიტიკის და სისტემების განყოფილება) ანგარიშში, რომელიც საქართველოში ჯანდაცვის მომსახურების საფასურის დაფარვას და ფინანსურ უზრუნველყოფას უკავშირდება.

ანგარიშში აღნიშნულია, რომ „ჯანდაცვაზე კატასტროფული ხარჯვის ინციდენტობა საქართველოში მაღალია ჯანმო-ს ევროპის რეგიონის სხვა ქვეყნებთან შედარებით”.

ჯანმო-ს ანგარიშის თანახმად, დაუყოვნებლივ საყურადღებოა ფასის უფრო მკაცრი რეგულირება.

„მედიკამენტების ხელმისაწვდომობის ასამაღლებლად ამბულატორიული მედიკამენტების პროგრამა მნიშვნელოვნად უნდა გაფართოვდეს, რათა მოიცვას როგორც მეტი მედიკამენტი, ასევე მეტი ადამიანი. დაუყოვნებლივ საყურადღებოა ფასის უფრო მკაცრი რეგულირება და მედიკამენტების რაციონალური დანიშვნისა და გამოყენების წახალისებისკენ ნაბიჯების გადადგმა. ჯანმრთელობის სერვისის ფასების სუსტი რეგულირება და პროვაიდერის შესაძლებლობა პაციენტებს ზედმეტი თანხა დააკისრონ (ბალანსის დაანგარიშება) ასევე ხელს უწყობს ჯიბიდან მაღალ გადახდებს სტაციონარული და ამბულატორიული მომსახურებისთვის. არაფორმალური გადასახადების აღმოფხვრის მიმართულებით მნიშვნელოვანი პროგრესის მიუხედავად, საქართველოში პროვაიდერებს შეუძლიათ დაადგინონ საკუთარი ფასები და პაციენტებს მოსთხოვონ გადაიხადონ განსხვავება ფასსა და საყოველთაო ჯანდაცვის პროგრამით დადგენილ ტარიფს შორის. თანაგადახდის სისტემა რთული და პოტენციურად დამაბნეველია პაციენტებისთვის. დაცვის მექანიზმები არაეფექტურია. საყოველთაო ჯანდაცვის პროგრამის შეღავათებზე წლიური ზედა ზღვარი, პროცენტული თანაგადახდის გამოყენება და პროვაიდერის მიერ პაციენტებისთვის დამატებითი თანხის დაკისრების შესაძლებლობა ჯიბიდან მაღალ გადახდებს იწვევს”, - ნთქვამია ანგარიშში.

ამასთან, ანგარიში საუბარია საქართველოში საყოველთაო ჯანდაცვის ხელმისაწვდომობაზე.

ანგარიშის თანახმად, საქართველოში საყოველთაო ჯანდაცვის პროგრამა 2013 წელს დაინერგა, რის შედეგადაც მნიშვნელოვნად გაიზარდა სახელმწიფოს მიერ დაფინანსებული ჯანდაცვით მოცული მოსახლეობის წილი.

საყოველთაო ჯანდაცვის პროგრამამ, რომლისთვისაც გათვალისწინებული იყო მნიშვნელოვნად გაზრდილი საჯარო დანახარჯები ჯანდაცვაზე, შეამცირა ხელმისაწვდომობის ფინანსური ბარიერები და გაზარდა სერვისებით სარგებლობა, განსაკუთრებით იმ ადამიანებისათვის, ვინც მანამდე არ იყო მოცული.

ჯანდაცვაში ამდენად საჭირო ინვესტიციის და ჯანდაცვის მომსახურებაზე წვდომის საგრძნობი გაუმჯობესების მიუხედავად, ევროპული სტანდარტების მიხედვით, კვლავ დაბალია საჯარო დანახარჯები ჯანდაცვაზე.

„შედეგად, ჯანმრთელობაზე მიმდინარე დანახარჯებში ჯიბიდან გადახდების წილი (48% 2018 წელს) კვლავ აღემატება ჯანმოს ევროპული რეგიონის ქვეყნების საშუალო მაჩვენებელს (30%). ეს მიმოხილვა ეფუძნება საქსტატის მიერ ყოველწლიურად განხორციელებულ შინამეურნეობების შემოსავლებისა და დანახარჯების გამოკვლევის მონაცემებს. კვლევის თანახმად, 2013 წლიდან 2018 წლამდე, ჯიბიდან გადახდები გაიზარდა ოჯახების დანახარჯების 7%-იდან 9%-მდე, რაც მიანიშნებს, რომ ჯანდაცვის სერვისებით სარგებლობის გაზრდასთან ერთად გაიზარდა შინამეურნეობების ჯიბიდან გადახდები. 2018 წელს, შინამეურნეობების დაახლოებით 7%-მა განიცადა გამაღატაკებელი დანახარჯები ჯანდაცვაზე, ხოლო 17%-მა გასწია კატასტროფული დანახარჯები ჯანდაცვაზე. ფინანსური შეჭირვების ეს მაჩვენებელი ერთ-ერთი უმაღლესია ევროპული რეგიონის მასშტაბით. ჯიბიდან გადახდების (69% 2018 წელს) ყველაზე დიდი წილი რეგულარულად მოდის მედიკამენტებზე, მას მოსდევს სტაციონარული (14%), და ამბულატორიული მომსახურება (11%). შინამეურნეობებს შორის ჯიბიდან გადახდილი დანახარჯების სტრუქტურაში მნიშვნელოვანი განსხვავებებია. 2018 წელს, ამბულატორიული მედიკამენტების წილმა ჯიბიდან გადახდების 90% შეადგინა უღატაკეს შინამეურნეობებში კატასტროფული დანახარჯებით, ყველაზე შეძლებულ შინამეურნეობებში კი -- 24%. მართალია, ამბულატორიული მედიკამენტების წილი იკლებს შინამეურნეობის მოხმარების ზრდასთან ერთად, სტაციონარულ, ამბულატორიულ და სტომატოლოგიურ სერვისებზე დანახარჯების წილი იზრდება შინამეურნეობის მოხმარებასთან ერთად. დროთა განმავლობაში, გაიზარდა მედიკამენტების წილი, რაც განპირობებულია ერთ სულზე მედიკამენტებზე ჯიბიდან გადახდების სწრაფი ზრდით, მოხმარების ყველა კვინტილში 2012- დან 2016 წლამდე პერიოდში”, - აღნიშნულია ანგარიშში.

ჯანმო-ს ანგარიშში აღნიშნულია, რომ 2018 წელს შინამეურნეობების დაახლოებით 7%-მა გაიღო ჯანდაცვის ხარჯები, რამაც გაღარიბება გამოიწვია, ხოლო 17%-მა ჯანდაცვასთან დაკავშირებით კატასტროფული ხარჯები გაწია.

„ფინანსური სიდუხჭირის ეს დონე ყველაზე მაღალია ევროპის რეგიონში. ფინანსური სიდუხჭირე მეტადაა კონცენტრირებულია უღარიბეს კვინტილში ყველა წლისთვის. 2018 წელს ყველაზე ღარიბი კვინტილის შინამეურნეობების 45%-მა და მეორე კვინტილის შინამეურნეობების 17%-მა გაწია კატასტროფული ხარჯები, ხოლო უმდიდრესი კვინტილის მხოლოდ 5%-მა გაწია ეს ხარჯები. ყველა კვინტილმა განიცადა ჯანდაცვის კატასტროფული დანახარჯების ზრდა დროთა განმავლობაში, მაგრამ ზრდის ძირითადი ნაწილი გამოწვეულ იქნა ორ უღარიბეს კვინტილში უფრო მაღალი ინციდენტობით. კატასტროფული ხარჯვა ყველა კვინტილში ძირითადად მედიკამენტებით არის განპირობებული, გარდა ყველაზე მდიდარი კვინტილისა. 2018 წელს მედიკამენტებზე გაწეული ხარჯები ჯიბიდან გადახდების 90%-ს შეადგენდა ყველაზე ღარიბი კვინტილის შინამეურნეობებში კატასტროფული ხარჯებით, ხოლო უმდიდრესი კვინტილის შემთხვევაში - 24%-ს”, - ნათქვამია ანგარიშში.

დეტალები

By Super User

მშობელი კატეგორია: ახალი ამბები

ივნ.23

გადასვლები: 178

ტოქსიკოლოგმა, „კლინიკურტოქსიკოლოგიური ასოციაციის" გამგეობის თავმჯდომარე თემურ კობიძე თბილისში, ბოლო სამ კვირაში მწვავე ტოქსიკური მოწამვლით პაციენტების ჰოსპიტალიზაციის შემთხვევების მატებაზე საუბრობს და მოსახლეობას რეკომენდაციებით მიმართავს.

როგორც კობიძე აღნიშნავს, მომატებული მწვავე ინტოქსიკაცია გამოწვეულია ალკოჰოლით, ნარკოტიკული საშუალებების მოხმარებით, ან ორივე მათგანის ერთად მიღებით.

მისივე განმარტებით, არ არის გამორიცხული, რომ ქვეყანაში სინთეთიკური ნარკოტიკის ახალი პარტია იყოს შემოსული და სწორედ ამიტომ იმატა პაციენტების ჰოსპიტალიზაციის რაოდენობამ. კობიძის განცხადებით, ამ მაჩვენებლის მომატების ყველაზე რეალური მიზეზი არის ის, რომ მოსახლეობამ თავისუფლად გადაადგილება და ქცევა დაიწყო, ეპიდსაწინააღმდეგო რეგულაციებს კი ყურადღებას ნაკლებად აქცევენ.

„მთელ მსოფლიოში აღიარებულია, რომ პანდემიის პერიოდში, მწვავე მოწამვლის რაოდენობამ დაიკლო, თუმცა ბოლო სამი კვირის განმავლობაში თბილისში მწვავე მოწამვლით განვითარებულ უგონო მდგომარეობაში მყოფი ავადმყოფების რაოდენობამ მოიმატა. შემთხვევების უმეტესობა ძირითადად ალკოჰოლური ინტოქსიკაციით, სინთეთიკური ნარკოტიკული საშუალებების გამოყენებით, ან კიდევ ორივეს ერთად მიღებით არის გამოწვეული. არ არის გამორიცხული, რომ ნარკოტიკის ახალი პარტია იყოს შემოტანილი, რომელიც უფრო ტოქსიკურია და ეს ხალხი სწორედ ამიტომ ხვდება სტაციონარებში, მაგრამ ჩემი შეხედულებით, ამის გამომწვევი ყველაზე რეალური მიზეზი ის არის, რომ მოსახლეობამ დაიწყო თავისუფალი სიარული და ქცევა, ეპიდსაწინააღმდეგო ღონისძიებებს კი ნაკლებად აქცევენ ყურადღებას“, - განაცხადა კობიძემ „მედიაცენტრ მთავარში“ გამართულ პრესკონფერენციაზე. მისი განცხადებით, მწვავე ტოქსიკური მოწამვლის ბოლო სამი კვირის შემთხვევებიდან ფატალურად არცერთი დასრულებულა, თუმცა იყო მძიმე შემთხვევები, როდესაც პაციენტებს ფილტვების ხელოვნური ვენტილაცია და ძლიერი ინტენსიური თერაპია დასჭირდათ.

ტოქსიკოლოგის განხადებით, „კლინიკურტოქსიკოლოგიური ასოციაცია" მოსახლეობას აფრთხილებს, რომ ზაფხულის პერიოდში და განსაკუთრებით, მომავალი 8 დღის განმავლობაში პროგნოზირებული მაღალი ტემპერატურისას თავი შეიკავონ ალკოჰოლური სასმელების მიღებისგან და მიიღონ დიდი რაოდენობით სითხე. „ჩვენი პროგნოზით, მწვავე ტოქსიკური მოწამვლის შემთხვევების მატება, ზაფხულის სეზონზე განსაკუთრებით კი საკურორტო ზონებზე უფრო მოსალოდნელია. მოსახლეობას ვაფრთხილებთ, საერთოდ ზაფხულის პერიოდში და განსაკუთრებით ამ ძალიან მაღალი ტემპერატურისას, რაც მომავალი 8 დღის განმავლობაში ამინდის პროგნოზით არის მოსალოდნელი, თავი შეიკავეთ ალკოჰოლის, განსაკუთრებით კი მაღალგრადუსიანი ალკოჰოლური სასმელების - როგორც ცალკე, ასევე სხვა ალკოჰოლურ სასმელებთან ერთად მიღებისგან, ასევე თავი შეიკავეთ ენერგეტიკულ სასმელებთან ერთად, მაღალგრადუსიანი ალკოჰოლური სასმელის არევით დამზადებული კოქტეილებისგან, დალიეთ დიდი რაოდენობით სითხეები: წყალი და ხილის წვენი. მაღალი ტემპერატურისას შეძლებისდაგვარად ერიდეთ მზეზე დიდხანს ყოფნას. პლაჟზე ყოფნის ოპტიმალური დრო არის დილის საათები და 16:00 საათის შემდეგი პერიოდი. გახსოვდეთ კორონავირუსის არსებობა, განსაკუთრებით მისი „დელტა ვარიანტი“, რომელიც ჩვენს მეზობელ ქვეყნებში მძვინვარებს და ჩვენთანაც არის ერთეული შემთხვევები. არ დაუშვათ თვითნებურად მკურნალობა, რადგან „დელტა ვირუსის“ სიმპტომები: სურდო და ხველა, ძალიან ჰგავს ჩვეულებრივ გაციებას და პაციენტს შესაძლოა აერიოს, „დელტა ვირუსის“ არსებობის შემთვევაში კი დროის დაკარგვა დაუშვებელია“, - განაცხადა კობიძემ.