საჰაერო მიმოსვლა რუსეთსა და საქართველოს შორის, შესაძლოა, აღდგეს. ამის თაობაზე რუსეთის საგარეო საქმეთა უწყების წყაროზე დაყრდნობით „კომერსანტი“ წერს.

გამოცემის მოსაუბრის თანახმად, მოსკოვი დააკმაყოფილა რუსეთის პრეზიდენტის ვლადიმირ პუტინის მისამართით ჟურნალისტ გიორგი გაბუნიას უცენზურო გამონათქვამებზე ოფიციალური თბილისის რეაქციამ.

"ლენტა რუს" თანახმად, რუსეთის საგარეო საქმეთა სამინისტროში აღნიშნეს, რომ თუ რუსოფობია საქართველოში შეწყდება, ხელისუფლება კი თანმიმდევრული იქნება, არ არის გამორიცხული ავიამიმოსვლის აღდგენა.

ამავე წყაროს ცნობით, რუსეთის მხარე მზადაა დაუბრუნდეს საქართველოს მოქალაქეებისთვის სავიზო რეჟიმის გაუქმების საკითხსაც.

კერძოდ, გამოცემა აღნიშნავს,რომ რუსეთის საგარეო საქმეთა სამინისტროს ცნობით, თბილისში ანტირუსული გამოსვლების დაწყებამდე სავიზო რეჟიმის გაუქმების გადაწყვეტილება შემუშავებული იყო და მარტო ხელის მოწერაღა იყო დარჩენილი.

„კომერსანტის“ მოსაუბრე ვარაუდობს, რომ სიტუაციის ნორმალიზების შემთხვევაში „ყველაფრის უკან დაბრუნება შეიძლება“.

''რადიო თავისუფლება''